خواب میں آواز اور جانوروں کی بولیوں کی تعبیر

خواب میں انسان کی آواز اس کی شہرت، بیداری میں اس کے نام کی گونج اور اس کے اثر و رسوخ کی علامت ہے۔ کسی انسان کی آواز سننا یہ ظاہر کرتا ہے کہ خواب دیکھنے والے کو کوئی اہم انتظامی منصب، ذمہ داری یا ولایت سونپی جائے گی۔

اگر کوئی شخص خواب میں دیکھے کہ وہ بلند آواز میں بات کر رہا ہے، تو وہ لوگوں کے کسی گروہ پر برائی یا ظلم کے ساتھ غالب آنے کی کوشش کرے گا۔ اگر کسی نے خواب میں کسی عالم، شیخ یا استاد کی آواز سے اپنی آواز کو زیادہ بلند کیا، تو یہ اس بات کی تنبیہ ہے کہ وہ کسی گناہ یا نافرمانی کا ارتکاب کرے گا۔

امام ابن سیرین ؒ سے منسوب ماخذ میں اپنی آواز کو جان بوجھ کر دھیما کرنا تواضع، خاکساری اور عاجزی کی علامت ہے، یا یہ کسی انسان کے مقروض ہونے کو ظاہر کرتا ہے۔ علامہ نابلسیؒ نے کمزور آواز کو کسی خوف یا ڈر سے منسوب کیا ہے۔

اگر کوئی حاکم، پولیس اہلکار یا بااختیار شخص خواب میں اپنی آواز کو کمزور یا مدہم پائے، تو یہ اس کے منصب سے برطرف ہونے، معزول کیے جانے، یا بدعملی پر سرزنش اور تادیبی کارروائی کا اشارہ ہے۔

اگر کسی جانور کے منہ سے انسانی کلام سنائی دے اور وہ بات سچی، حق اور دل کو بھانے والی ہو، تو خواب دیکھنے والے کو خیر، منفعت اور بے شمار فوائد حاصل ہوں گے۔

علامہ نابلسیؒ سے منسوب ماخذ میں درہم کی آواز وعدہ پورا ہونے، دینار کی آواز خوش کن خبر، جبکہ عام پیسوں کی آواز تکلیف دہ خبر کی علامت ہے۔ بعض تعبیرات میں دراہم اور دنانیر کی آواز خوبصورت کلام کی علامت بھی ہے۔

امام ابن سیرینؒ سے منسوب ماخذ کے مطابق خواب میں سکوں کی جھنکار فتنہ یا صرافوں اور مال کے لین دین سے وابستہ افراد کے درمیان جھگڑے کی علامت ہے۔ اگر سکے دوستی کی علامت یا مہر کے طور پر دیے جائیں اور ان سے جھنکار پیدا ہو تو اس کی تعبیر اچھی یا بری خبر، حکمت بھری بات یا پسندیدہ کلام سے کی گئی ہے۔ لیکن اگر خواب میں سکوں کی جھنکار مذاق کے طور پر یا کسی کو بلاوجہ تنگ کرنے کی نیت سے پیدا کی جائے تو اس کی تعبیر ایسے جھگڑے سے کی گئی ہے جسے ختم کرنا مقصود نہ ہو۔

علامہ عبدالغنی النابلسیؒ کے مطابق بکری کی آواز کسی سخی، مہربان مرد کی طرف سے اچھے سلوک کی علامت ہے، جبکہ امام ابن سیرینؒ سے منسوب ماخذ میں بیوی یا خاتون کی طرف سے عمدہ سلوک اور بھلائی کی نشانی ہے۔ دنبے یا چھوٹی بکری کی آواز سرور، دلی خوشی، خیر اور فراخیِ رزق سے تعبیر ہے۔

خواب میں گائے، بیل یا بچھڑے کی آواز یا پکار سننا ہنگامہ آرائی، بدامنی یا فتنے میں پڑنے کا خطرہ ظاہر کرتی ہے۔

خواب میں اونٹ کی آواز یا اس کا گڑگڑانا کسی بڑے اور بابرکت سفر کی علامت ہے۔ اس سفر کو فریضۂ حج کی ادائیگی، جہاد کی راہ یا نفع بخش تجارتی سفر سے تعبیر کیا گیا ہے۔ اس خواب کی ایک تعبیر شدید محنت و مشقت کا سامنا کرنے سے بھی کی گئی ہے۔

خواب میں گھوڑے کی ہنہناہٹ سننا علامہ نابلسیؒ کے مطابق کسی شریف، معزز انسان یا بہادر سپاہی کی طرف سے تحفہ ملنے کی دلیل ہے۔ امام ابن سیرین ؒ سے منسوب ماخذ میں کسی عظیم شخص سے رہنمائی ملنے، بہادر سپاہی کی نمائندگی اور لشکر کشی یا غلبہ و شوکت پانے کی نشانی ہے۔

امام ابن سیرینؒ اور علامہ نابلسی ؒ سے منسوب تعبیرات کے مطابق خواب میں گدھے کا رینکنا یا اس کی آواز بدصورت، گھٹیا اور ذلیل دشمن کی نمائندگی کرتی ہے۔ گدھے کی آواز کی دوسری تعبیر دشمنوں پر لعنت بھیجنے یا ان کے خلاف بددعا کرنے سے بھی کی گئی ہے۔

خواب میں خچر کی آواز کسی سخت گیر انسان سے واسطہ پڑنے، مشقت جھیلنے، بے فائدہ گفتگو سننے، یا مشتبہ معاملات میں الجھنے کی علامت ہے۔

علامہ نابلسیؒ نے خواب میں شیر کی دھاڑ سننے کو ظالم و طاقتور حکمران سے خوف، دھمکی، ہیبت، یا سراسیمگی اور تشویش کا شکار ہونے سے تعبیر کیا ہے۔ امام ابن سیرین ؒ سے منسوب ماخذ میں شیر کی دھاڑ بااختیار شخص سے خطرےاور شیخی بگھارنے کی علامت ہے۔

امام ابن سیرین ؒ اور علامہ نابلسیؒ سے منسوب تعبیرات کے مطابق خواب میں کتے کا بھونکنا لایعنی گفتگو، دوسروں کے معاملات میں دخل اندازی، گناہ، ندامت، نافرمانی، دشمنی، دوسروں کو نقصان پہنچانے کے ارادے یا اختلاف کی علامت ہے۔

خواب میں چیتے کی غراہٹ بیداری کی زندگی میں بے باکی، تکبر، ناز اور غرور کی نمائندگی کرتی ہے؛ جبکہ جنگلی بلی (Lynx) کی آواز کسی غیر مستقل مزاج اور حریص شخص کی جھوٹی تسلی اور اس سے فائدہ اٹھانے کا اشارہ ہے۔

خواب میں بھیڑیے کی آواز چوری ہونے یا ظالم ڈاکو سے ڈرنے کی تنبیہ ہے؛ جبکہ گیدڑ کا چیخنا نیکی و بدی سے متعلق کام، بے بس عورتوں کا مدد کے لیے پکارنا یا ناامید لوگوں کی فریاد ہے۔

خواب میں لومڑی کا چیخنا ہجرت کرنے، فرار ہونے کی تنبیہ، یا جھوٹے شخص کے بغض و حسد اور دھوکے کا شکار ہونا ہے۔ خنزیر کی آواز بیوقوف، احمق مگر مالدار دشمنوں پر فتح پانے اور ان کا مال چھیننے کی دلیل ہے۔

امام ابن سیرین ؒ اورعلامہ نابلسیؒ سے منسوب ماخذ میں کبوتر کی غٹرغوں نوحہ بازی، نکاح یا کسی پردہ دار اور قاریہ عورت کی طرف اشارہ کرتی ہے؛ جبکہ ابابیل کی چہچہاہٹ قرآنِ مجید سننے، واعظ کی نصیحت اور فائدہ مند کلام پانے کی دلیل ہے۔

خواب میں کوے کی کائیں کائیں جدائی، فراق یا کسی کی موت کی خبر کا پیش خیمہ مانی جاتی ہے؛ اور شتر مرغ کی آواز کسی نئے بااعتماد اور بہادر ملازم یا خادم کو ملازم رکھنے کی علامت ہے۔

علامہ نابلسیؒ کے مطابق مینڈک کا ٹرانا یا اس کی آواز گانے، چوکیدار کی آواز، کسی عالم کے کام میں مداخلت یا قبیح کلام کی علامت ہے۔ امام ابن سیرینؒ سے منسوب ماخذ میں اس کی تعبیر گھنٹیوں کی آواز، بہت زیادہ خوشی، استاد کی ملازمت، قیادت حاصل ہونے یا کسی کی طرف سے سخت الفاظ سننے سے بھی کی گئی ہے۔

سانپ کی پھنکار چھپے ہوئے دشمن کی طرف سے لڑائی اور دھمکی کی علامت ہے۔ علامہ نابلسیؒ کے مطابق خواب میں سانپ کی پھنکار سننا دشمن کی طرف سے کسی زیادتی کی دلیل ہے۔

خواب میں بلی کی میاؤں غیبت، نکتہ چینی اور عیب جوئی کی نمائندگی کرتی ہے۔ چوہے کی آواز الفت، اجتماع اور رزق پانے کی علامت کے ساتھ نقب زن چور سے نقصان اٹھانے سے بھی تعبیر ہے۔ ہرن کی آواز وطن کی یاد اور پردیس کے احساس کو ظاہر کرتی ہے؛ اور بھڑ کی بھنبھناہٹ دوسروں کو بدنام کرنے والے شخص کی طرف اشارہ کرتی ہے جس کا شر اسی جیسے دوسرے شخص کی مدد کے بغیر ختم نہ کیا جا سکے۔

علامہ نابلسیؒ نے خواب میں پانی کے بہنے، مور اور مرغی کی آوازوں کو ناپسندیدہ قرار دیا ہے اور اسے غم اور صدمے کی دلیل بتایا ہے۔ آوازوں سے متعلق خواب کا عمومی اصول یہ ہے کہ ہر وہ آواز جو سننے میں کرخت، بری اور ناگوار گزرے وہ غم، رنج اور الم کا پیغام ہے؛ جبکہ ہرخوشگوار اور دل کو بھانے والی آواز سرور، خوشی اور راحت کی علامت ہے۔